قصتى : تحقيق حلمى الصعب من 150 كيلو ل 70 كيلو 🙂
السلام عليكم و رحمة اللهو بركاتة 🙂
النهاردة قررت اشارك معاكم قصتى , كالعادة من قيمة سنتين كنت تخين جدا وزنى كان
وصل ل 150 كيلو جرام و يمكن اكتر و طول وقتها كان 175 فقط و
طبعا الوزن دة للطول دة حاجة صعبة اوى !
شكلى كان فظيع , كنت ساعتها لسة فى 3 ثانوى و مكنتش بحب اروح المدرسة
حتى علشان طبعا الكسل الرهيب اللى بيجى مع التخن و كمان المضايقات اللى كانت بتحصلى
فى المدرسة , بعديها دخلت الجامعة و دية كانت المصيبة اللى قابلتنى , لانى مكنش
عندى ثقة فى نفسى نهائى كنت بتعرض بردو لمضايقات فا كنت انطوائى جدا و مش
بكلم حد الا قليل جدا و هنا قررت انى ابدا انزل وزنى و فعلا رحت
لدكتور تغذية ..
ادانى امل كبير بس بعد اكتر من شهر لقيت ان وزنى منزلش غير 10 كيلو
فقط !
بصراحة اتضايقت و كمان لاحظت ان الدكتور مش بيعمل اى حاجة غير انة يدينى ورقة
هو بيبقى مجهزة و مصورها اكتر من صورة !
و هنا بدات اجيب كتب كتير عن الرجيم و الانظمة الغذائية ” غاوى قراية معلش
😛 ” و قعدت اقرا عن ازاى جسم الانسان بيشتغل و اية كميات السعرات الحرارية
اللى بحتاجها و بدات اتابع مع نفسى بدون دكاترة تغذية , و بعد ما بقى
وزنى الحمد لله 120 , اكتر صعوبات مريت بيها فى المرحلة دية هى فعلا انى
ابطل الاكلات اللى كنت بعشقها اكتر من اى حاجة و طبعا ما شاء الله كلها
كانت ضارة ههههه مكرونات و البيبسى و ماكدونالدز و الخ الخ الخ من الحاجات اللى
بتدمرنا دية xD , كمان كنت لسة مبتدا فى الانظمة الغذائية و حصلى مشاكل مرضية
لانى مكنتش باكل سكريات خالص و رحت المستشفى و الدكتور نصحنى انى اكل معلقة عسل
الصبح قبل الفطار و دة كان بسبب انى مكنتش بتابع مع دكتور فنصيحة منى تابعو
مع دكتور بس يكون فاهم احسن من اللى انا عملتة دة لانى تعبت جدا الفترة
دية ربنا معاكم 🙂
بعديها كان فى شقة فاضية فى بيتنا قررت انى اعملها جيم منزلى و جبت فيها
الاول عجلة و مشاية بس لحد ما وزنى نزل 100 كيلو , طبعا مش عاوز
اقلكم قد اية الموضوع دة كان صعب , مكنتش بعرف اعمل تمرين واحد صح و
كنت دايما بجيب ناس صحابى تساعدنى فى التمرينات لحد ما بقيت اعملها لوحدى و دة
كان حلم بالنسبالى و الحمد لله حققتة 🙂 , و بعديها بدات ازود المعدات اللى
عندى و اجيب اجهزة علشان و انا بنزل اعمل فورمة لجسمى مش مجرد نزول فى
الوزن بس , و فعلا بدات امشى على نظام غذائى خاص بالموضوع دة ” بتاكل
كمية بروتينات كويسة مع التمرين بدون اى نقطة دهون فى اكلك ” و بدات اقسم
جسمى , حاليا وزنى بقى 70 كيلو بس لسة المشوار منتهاش و مش هينتهى ان
شاء الله 🙂 , لان بعد كدة لاحظت ان الرجيم مش بس اداة بنستخدمها لنوصل
لحلمنا لا دة طريقة حياة و مستوى راقى و جميل جدا انك تبقى طول الوقت
بصحة كويسة بعيد عن كل الاكل المضر اللى بناخدة فى حياتنا و بيقصر عمرنا ^^
يمكن قصتى عادية و مفيهاش حاجة جديدة بس اتمنى يكون اى حد استفاد منها ,
و هكون سعيد جدا لو حد بدا تخسيس بسبب قصتى المتواضعة دية مفيش حاجة مستحيلة
ان شاء الله 🙂 ….
- أفضل نظام دايت لوزن 150
- رجيم لوزن 150 كيلو
- وزن 150
- وزني 150 كيلو وعاوز رجيم مناسب
