كثير من الفتيات لا تعلم معلومات كثيرة عن الكيراتين وانواعه واسعاره لهذا سنقدم لك بعض
نصائح خبيرة الكيراتين بسمة الحسيني .
اختاري نوع الكيراتين المناسب لشعرك
بنات كتير ماتعرفش ان طبيعة شعرها بتتحكم في نوع الكيراتين اللي هتستخدمه، علشان كده لازم
قبل ما تاخدي قرار انك تعملي كيراتين تعرفي كل حاجة عن انواعه المختلفة.
لكن قبل ما نتكلم عن الانواع المختلفة لازم تكوني واثقة ان الكيراتين اللي بتستخدميه اصلي،
وده بانك تشتريه من شركة موثوق فيها ولها اسم، مش اي منتج للكيراتين وخلاص، علشان
ممكن نسبة الفورمالين فيه تكون عالية، ودي هي المادة اللي بتؤذي الشعر.
وزي ما قلنا فيه انواع مختلفة من الكيراتين اللي بتناسب انواع الشعر المختلفة، ومنها:
كيراتين الكولاجين: وده كيراتين مضاف عليه مادة الكولاجين، وبتكون نتيجته هايلة وبتنعم الشعر، ودي طبعا
اهم حاجة عند معظم البنات انها تحصل على شعر ناعم، وده بيكون مناسب للشعر الخفيف
والخشن والشعر اللي بيكون فيه تشابك عند الاطراف.
كيراتين ماء الذهب: الذهب له فوائد كتيرة للبشرة والجسم والشعر، والنوع ده من الكيراتين بيفيد
الشعر في انه بيضفي عليه لمعان طبيعي وشكل صحي، لكن النوع ده مش كتير من
الشركات بتعمله.
كيراتين الصلصال الابيض: النوع ده مفيد جدا في فرد الشعر، لانه بيبقى مضاف عليه كمان
نسبة فورمالين بسيطة جدا، وبيعمل نتيجة فرد بتوصل الى 80%، علشان كده النوع ده مناسب
للشعر المجعد.
كيراتين الاورجانك: كيراتين مضاف اليه مجموعة من الاحماض الامينية، وبيكون امن جدا لدرجة انه بيستخدم
على شعر الاطفال والحوامل، وكمان مفيد في فرد التمويجات البسيطة للشعر الناعم.
كيراتين الكاكاو: الكيراتين المضاف عليه زيت الكاكاو، وده بيفيد في علاج الشعر الهايش والمقصف.
اهم حاجة اننا نكون عارفين ان كل نوع كيراتين له طريقة استخدام مختلفة، كمان المادة
اللي بيتغسل بها الشعر قبل عمل الكيراتين بتختلف حسب طبيعة الشعر، يعني فيه مواد مثلا
مش بتكون مناسبة مع الشعر المصبوغ او اللي معمول فرد كتير.
كمان فيه انواع من الكيراتين بتبقى محتاجة تجفيف للشعر بالسيشوار قبلها، وفيه انوع تانية مش
بتكون محتاجة سيشوار.
اسعار الكيراتين
الكيراتين يعتبر خدمة وليس منتج للبيع، لاننا بنروح للكوافير علشان نعمله، وده معناه اننا بندفع
الفلوس مقابل الكيراتين والخدمة.
عموما زجاجة الكيراتين اللي ممكن تكفي لاكثر من شخص سعرها بيتراوح من 2000 : 5000
جنيه، علشان كده انا بافضل اننا نبعد عن اي مكان بيعمل الكيراتين باسعار قليلة، 300
و400 جنيه، لان ده هيبقى كيراتين لبناني وكمان هتحصلي على خدمة سيئة للشعر.
كمان الاسعار المبالغ فيها زي 3000 و4000 دي انا باعتبرها غالية اوي، خصوصا ان تاثير
الكيراتين مش بيكون دائم على الشعر، ومدته بتتراوح من 2 : 6 شهور.
ازاي تحافظي على شعرك بعد ما تعملي الكيراتين؟
الكلور والاملاح هما اكتر حاجات ممكن تؤثر على شعرك، وخصوصا لو عاملاه بالكيراتين، وللاسف الكلور
بيبقى موجود في المياه الطبيعية، علشان كده لازم نغسل شعرنا بحد اقصى مرتين في الاسبوع،
كمان الاملاح بتبقى موجودة في منتجات العناية بالشعر، علشان كده لازم نتاكد ان المنتج اللي
هتشتريه سواء الشامبو او البلسم يكون خالي من الاملاح، ويفضل انه يكون فيه نسبة كيراتين.
في النهاية لازم نعرف ان نجاح عملية علاج الشعر بالكيراتين بتعتمد على عدة خطوات، لو
خطوة منهم اتعملت غلط بتكون النتيجة مش مرضية، بداية من نوع الكيراتين الجيد وحتى طريقة
العمل، ونهاية بالحفاظ على الشعر والتعامل معاه بشكل صحي
