العين تبكي

هلت دموع الشقا الله لايعاقبني !! العين تبكي وانا ادري وش مبكيها

يا دار ياليتني ما جيت لك زاير
ما جيت يم السليل ودجت بالعاير

اقول ابمرها وامشي على الطاير
طول وقوفي بها وابطيت اراعيها

( يا دار وين البيوت اللي لها رنه
واهل القيم والشيم والفرض والسنه

قالت توفوا وراحوا يا ملا الجنه
وش ينبغى بالمنازل عقب اهاليها

قمت اتلفت ولا ادري ويش صايبني
ما ادري وش اللي على الاطلال جايبني )

هلت دموع الشقا الله لايعاقبني
العين تبكي وانا ادري وش مبكيها

تبكي على ماضي الاجداد ورسومه
وبيوت باقي اثر وبيوت مهدومه

يا عين على البكا ما نتيب ملزومه
ذي سكة كل خلق الله مشوا فيها

ولدت عيوني وشفت الرجم بالعالي
يبكي ودمعه على الاوجان همالي

( يقول راحوا وخلوني هنا الحالي
في غربة شاب منها راس راعيها )

واضحت بساتينهم منهم خلاويه
يلعي بها البوم لا هذي ولا ذيه

واليوم مابه كلاليف وحرفيه
الله يستر من الدنيا وتاليها

ما باقي الا القميري يسجع لحونه
من سمع صوته تهيض خافي شجونه

صحيح الايام ابد ما هيب مامونه
ام البلاوي كفانا الله بلاويها

اقفيت عنها ودمع العين منهلي
طاري طرى لي ذبحني جعله يولي

اظني ما عاد امر الدار واحسن لي
ما يبكي العين كود افراق غاليها