قصائد غزليه من التراث الجميل
الصياد:
لا غاب عن عينك حبيب توده…..فاحسب نجوم الليل وامرح خلاوي
هذا وانا لي عنه ياناس مده ….والقلب من جور المحبه شقاوي
عن جيتي يمكن عذوله يرده…..والا بهجري ناعم العود ناوي
مسكين قلب عودالحب ضده…..ماهو على خفق بفرقاه قاوي
هجري تعدى مع هوى البال حده ….وبعده على قلبي كثير البلاوي
حبل الوصل يرخيه والا يشده…..انا على درب المحبه رجاااااوي
راشد بن جعيثن :
منك انتهينا يا مخيب رجانا %% الصبر طال وعذبتنا المشاوير
في موت حبك يجبر الله عزانا %% بيدك رميته لا تقول المقادير
لولاك حنا ماتبدل غلا ناكل %% الوفا منا ولا منك تقدير
قلنا سحابه صيف تعبر سمانا %% وتزول ماله في سما الحب تاثير
غدرك على نسيان حبك حدانا %% هذي سواتك ما تفيد المعاذير
عفناك واللي عالم في خفانا %% البعد عنك ارحم وقلبك مع الغير
تبيعنا واليوم تبكي هوانا %% لا يا عديم القلب فرقاك لي خير
عبدالله العليوي رحمه الله:
شفتك مع اللي صار عقبي حبيبك %% واحتارت العبره بعيني وصديت
مدري هي الصدفه لدربي تجيبك %% مدري انا اللي في دروبك تحريت
ملكتني واقفيت ربي حسيبك %% ما تعرف الرحمه بقلب توليت
يا قلب جرحك سبته من طبيبك %% يا قلب ليتك بالوفاء ما تماديت
من حبنا كل السعاده نصيبك %% يا فاقد الاحساس عني تخليت
وش فايده لا قلت عني حبيبك %% وانت بحياتك يوم ماظن حبيت
عبدالله العليوي رحمه الله:
خلاص لاترجع ترانا سلينا %% ما كنت اصدق يوم اني ابنساك
في بعدكم ياما عليكم بكينا %% واليوم ما تطري على البال طرياك
واناادري انك رغم صدك تبينا %% لاشك ناس ضدنا تقصر اخطاك
خل الذي غير حنانك علينا %% يعطيك من قلبه ربع ما عطيناك
وشعاد لا صار السلام بيدينا %% قلبي وقلبك بينها دارت افلاك
ودعت ماضي حبنا وانتهينا %% وقلب نسيته يوم لابد ينساك
من سكرةالحب الصناعي صحينا %% حتى المجالس عفتها خوف ذكراك
حب جديد غير حبك لقينا %% حديتني جعل الليالي تحداك
- لاغاب عن عينك حبيب توده
