على مر السنين

يامرحبا ترحيبة تبقى على مر السنين

ترحيبة مثل الورود تفوح يوم ابدا بها ..

تفوح من صادق محبتكم ورود وياسمين

تمطر غلاكم يابعد عيني وعين اهدابها..

تفضلوا لي واسمعوا بقلوبكم ياسامعين

من قبل لاتستمتع الاسماع واطرق بابها ..

الشعر ديوان العرب والفرق بين المبدعين

فالابتكار ونادر الافكار واستجوابها..

عليك يا قافي سلام وخل عنك العاذلين

تبختر بوسمك وقافيتك في مرقبها..

واطرب هل الذوق الرفيع من اليسار الى اليمين

سجل حضورك فرصتن جاتك وربك جابها..

ياصاحبي والخير كانه مطلبك دنيا ودين

ركز معي واحسب لحاجتن ثلاث حسابها..

الاوله ركز على مرضاة رب العالمين

ماغيره يعينك اذا صكت عليك ابوابها ..

والثانيه من قبل ترضي النفس ترضي الوالدين

من دونهم لو تبتسم دنياك وش تبغى بها ..

والثالثه حاول تمنى الخير لناس اجمعين

ياصاحبي لاتحسد العالم ولا تغتابها ..

اقولها وانا الي مقصر ياربي يامعين

رحمتك يوم النفس في الميعاد تلقى حسابها ..