للي مش فاهمين نزولنا
للي ما عاشوش ظلمنا ولا قهرنا وحسوش نزولنا
للي ما داقوش مر جوعنا
اللي ما ناموش في الشوارع كالدبايح
كملوا بالليل عشاهم م الصفايح
للي مش فاهمين مهانة الرجال
قهر الرجال
اللي بيقولوا علينا اننا حبة عيال
احنا مش حبة عيال
احنا شفنا النيل بينشف في البيوت
واما يجري يتفرش حمام سباحة في قصر باشا
مستكترين في الغضب؟!
ما انا كنت غرقان في البشاشة!
كنت راضي ببق مية واقول: دي هانت
كنت باشكي في القصايد
كنت باشتم في القصايد
تتقطع ايدي اما قلت: “حبيبتي ماتت”
للي مش فاهمين نزولنا في الشوارع
احنا بندور على الحلم اللي ضايع
احنا جرينا النفس في عروق عيالنا
يكبروا فاهمين حاجات مافهمناهاش
اقبل اني اعيش عشان حلم وقضية
بس ما اقبلش ان عمري يضيع بلاش
ما احنا سبنالكو البلد.. ما نصفتوهاش
ماتلوموش عاللي اتعجن في المعجنة واللي اتظلم
لذا كنتو فاكرينا غنم.. على حظكم انا جدي فاق
فاكرين زمان.. حذرتكم
“مستني ايه من طفل ربوه بالزعاق؟”
لذا كنتو فاكرينا غنم
على رزقكم انا جدي فاق
ارزاق
للي مش فاهمين نزولنا في الشوارع
الحكومة عودتنا على الشوارع
بيتتنا في الشوارع
نيمتنا في الشوارع
الحكومة قفلت على نفسها كل البيبان
خوفتنا م البيبان
فاترمينا كلنا ف حضن الشوارع
اكتر مكان لقيناه امان
*
للي خايفين ع البلد لاحسن تموت
ماتخافوش.. الموت سكوت
واحنا مش في الخطة اصلا
ان بكرة يكون سكوت
احنا شايلين حملنا ومكملين
بكرة بيشاور علينا واحنا مش مستعجلين
ما احنا لينا كام سنة متقندلين
صابحين في طين.. نايمين في طين
احنا بناسس بلد تسمع شكاوى المظلومين
نشتغل نلقى عرقنا قصاد عينينا
مش في جيب النصابين
نشتكي..
نلقى اللي يسمع شكوة الناس الغلابة الطيبين
احنا بنشكل بلد لا هي خايفة من صوت الادان..
ولا خايفة من ان الكنايس تتبني
احنا بنشكل وطن عفيان غني
مش وطن يخدم خمستاشر نفر.. ويبات جعان
احنا مش عايزين وطن مذلول مهان
المصري مش لايقة عليه كلمة “مهان”
ويقولك احنا عملنا فوضى!
احنا برضه عملنا فوضى؟!
احنا كنا بنتجلد
احنا كنا بنتسرق ونعيش ونرضى
كانت الاسعار بتغلا وكنت بارضى
والشرطة بتفتشني عادي في اي وقت ف اي حتة
بدون مناسبة.. وكنت بارضى
والانتخاب من سن كام لسن كام
ما اعرفش ليه.. وكنت بارضى
جاي النهاردة تقول لي احنا عملنا فوضى؟!
طب فوضى فوضى!
ونتحاسب!
ماسورة الغاز بتقفلها لصعيد بلدك.. و(تل ابيب) بتفتحها
ماسورة الغاز بتقفلها على ولادك.. وللاعداء بتفتحها
وناس شقيانة طول اليوم عشان لقمة
و(غالي) ياخدها من قوتهم.. الهي يارب يطفحها
وناس تسكن قصور بتدور.. وناس الجوع بيدبحها
وناس بتموت في الميادين فدا الثورة
وناس خايفة على مشاعره لانجرحها
ياخي…!
*
احنا هانكمل وهنزق البيبان
يا رب.. انت المستعان
واللي بيقولوا علينا مغيبين
ومسطحين ومجوفين
ومعفنين ومنتنين
وبلطجية وماجورين
قولوا براحتكم!
احنا برضه مؤدبين ومسالمين
بس احنا برضه.. مكملين
- مكملين بصوت الجخ
- مكملين هشام الجخmp3
- قصيده مكملين هشام الجخ mp3
