الي كل انثي مخطوبه او في طريقها للخطوبه
الي كل بنت لاتعرف كيف تتعامل مع خطيبها
هناك بعض الاساسيات التي يجب اخذها في الاعتبار حتي لاتقعين في فخ الملل من الخطوبه
وفشل العلاقه التي تحلم بها كل بنت
الاساس الاول
القبول
ده اول اساس لازم تقوم عليه العلاقة بين اي اتنين مخطوبين.. هو انه يكون فيه
قبول بينك وبينه.. والقبول ده بيكون من حيث الشكل والدم، ولا يوجد ما ينفرك منه
او ينفره منك..
الاساس الثاني
خليك رقيقة
لازم كل بنت تكون رقيقة في تصرفاتها مع خطيبها، ومش قصدي هنا الرقة المصطنعة.. لا
طبعا.. قصدي انك تتعاملي معاه على طبيعتك وباسلوبك الحلو اللي يخليه يحس انك احلى انسانة
في الدنيا، وطبعا من غير تكلف او كدب.
الاساس الثالث
افتحي مجالات للكلام
خليك ذكية وافتحي مع خطيبك مجالات للكلام؛ حتى لو الكلام البسيط زي مثلا انك تقولي
له على الحاجات اللي بتحبيها، وتساليه هو كمان بيحب ايه.. ومش عيب انك تتكلمي معاه
عن حياتك ايام الدراسة.. عن ايه اللي حققتيه في حياتك قبل ما ترتبطي بيه.. وايه
اللي نفسك تحققيه بعد كده.. ايه الحاجات اللي بتفرحك.. وايه الحاجات اللي بتضايقك.
وخليه هو كمان يتكلم عن نفس الموضوعات دي، واسمعي كلامه كويس، وركزي فيه.. وعلى فكرة
الموضوعات دي بالرغم من انها بسيطة الا انها هتفتح مجالات تانية للكلام.. وهتخلي كل طرف
يتعرف على وجهة نظر الطرف التاني في الحياة.
وكمان هيعرف ايه الحاجات اللي بيحبها الطرف التاني ويعملها.. وايه اللي بيكرهها وبتضايقه علشان يتجنبها.
الاساس الرابع
احترمي رايه
احترمي راي خطيبك في اي حاجة يقولها، واوعي تسخري من كلامه حتى لو انت شايفة
ان كلامه كده سطحي ومش عاجبك.. اسمعيه للاخر وشوفي وجهة نظره ايه، وحاولي باسلوب هادي
انك تقنعيه بوجهة نظرك.
الاساس الخامس
احترمي صراحته
لو خطيبك صرح لك بحاجة محدش يعرفها غيرك، زي مثلا انه اتكلم معاكي عن امكانياته
المادية احترمي صراحته دي.. واقفي جنبه.
الاساس السادس
محدش كامل
خليك دايما حاطة قدامك القاعدة دي وهي: “ان مفيش حد كامل، وان الكمال لله وحده”..
يعني صعب جدا انك تلاقي خطيبك مفيهوش عيوب.. اكيد لازم يكون فيه عيوب.. بس انت
خليكي ذكية.. وشوفي يا ترى العيوب دي مقبولة ولا لا.. لو كانت مقبولة وهتقدري تستحمليها
يبقى مفيش مشكلة..
الاساس السابع
حاولي تغيريه
والاساس ده مرتبط بالاساس الرابع، يعني شوفي ايه العيوب اللي في خطيبك وحاولي انك تغيريها
للاحسن بس طبعا باسلوب حلو ومن غير ما يحس.
زي مثلا.. لو كان لبسه مش شيك يبقى حاولي بالراحة انك تغيري العيب ده بانك
تنتهزي اي مناسبة وتجيبي له مثلا قميص شيك وتقولي له: ان الموديل ده بيخليه احسن
من الموديلات التانية اللي بيلبسها.. ويا ريت يحاول انه يغير للموديلات الجديدة دي…
الاساس الثامن
بلاش حد يدخل بينكم
شوفي يا قمر.. علشان العلاقة بين اي اتنين تنجح يبقى محدش يدخل بينكم خصوصا الاصدقاء..
واي خلاف بينكم حاولوا انكم تحلوه بينكم وبين بعض.
واوعي تقارني بين خطيبك وخطيب واحدة صاحبتك او خطيب اختك.. خليك عارفة ان كل واحد
بيختلف عن التاني، وكل واحد وليه ظروفه.
الاساس التاسع
قربي من اسرته
يا ريت تحترمي اسرته، وتحاولي انك تقريي منهم، وتكوني صديقة ليهم، وتنتهزي اي مناسبة وتزوريهم،
ومفيش مانع من انك تاخدي معاك هدية شيك؛ لان دي هتخلي مامته تحبك، وده اللي
احنا عايزينه.
الاساس العاشر
بلاش نتكلم في الماضي
بلاش تتكلمي عن حياتك العاطفية في الماضي قبل ما ترتبطي بيه، ولا تساليه هو كمان
عن حياته العاطفية قبل ما يرتبط بيك، وكل واحد ينسى اللي فات في حياته، ويبدا
صفحة جديدة.. دي حاجة.. ولو عايزين تتكلموا في اللي فات يبقى الكلام يتفتح مرة واحدة
بس، ويكون من غير تفاصيل كتير
- كيف تتعامل الفتاة مع خطيبها
