كلمات قصيدة المكالمة

المكالمه هشام الجخ

خلاص عرفت!

عملوا ثورة وشالوا زفت!

بس ما تقوليش: خلاص مشوا “حمارك”!

اي واحد بعده هنخليه حمارنا..

حتى لو ماكانش اسمه “حمارك”

شعب مين يا جحش انت؟

هي (مصر) امتى حكمها شعب؟!

(مصر) بتسلم ودانها لاي كلب

بس يتزوق شوية!

“شرعية”..

“ديموقراطية”..

“ليبرالية”..

“عسكرية”..

اي كلمة فيها “اية”!

اي كلمة تكون “طرية”

الشباب المصري منظر

كله فاكر نفسه (عنتر)

انفخوهم انتو بس وعظموهم!

فهموهم ان رايه ده امانة

وان اي كلام يخالف رايه.. يبقى بدات الخيانة

وافردوا ايديكم شوية بالفلوس.. الناس جعانة!

فنانين؟!

فنانين ومثقفين دول عند خالتك!

دول شحاتين!

يابني كله قصاد فلوسك

راح يبوسك

فيه ولد شاعر كويس

شفته مرة بيشتم الريس

طلعوا الولد ده في الاعلام كتير!

اشتروه!

حتى لو كان سعره غالي

هاتوا رجله واحدة واحدة.. وبالطريقة

واكسروا عينه وداغه

بس اوعوا يحس بينا

خلوه كده مصدق دماغه

اديه فلوس .. ادوه كتير

واحدة واحدة هيبقى واحد م الحمير

والحمير واقفين طابور

واحنا مالناش اي دور

احنا بس يا دوب بنديهم فلوس

بس احنا مش على المسرح يا بابا

احنا فين؟..

في الكالوس!

هم هيادوا الوظيفة فرد فرد

احنا هنجيب الديكور

احنا هنظبط اضاءة.. يبقى عرض

هم ثورة.. وهم شعب..

ياكلوا بعض!

اما احنا..

احنا نسمة.. احنا بلسم

وحلنى على بال ما حد يفوق ويفهم

*

ليه يا شيخنا؟

طب هنعمل ايه يا شيخنا؟

طول ما هو الاعلام سالخنا

واحنا برضه يعني لسه مسيطرين

طول ما الناس جعانة ومطحونين

الجوع جهالة.. والجهل جوع

والجوامع تحت ايدنا في البلاد وفي النجوع

هي الناس هتفهم “ليبرالية” و”ماركسية”؟!

الناس هتفهم “اسلامية”

الغلابة في القرى مالهمش خلق للحوار

دول ناس غلابة..

يا اما جنة.. يا اما نار

واحنا طبعا طرح جنة

هي الناس هتاخد دينها عنهم.. ولا عنا؟!

احنا اللي بنقول الحرام

واحنا اللي بنقول الحلال

احنا اللي هنسوقهم يمين..

واحنا اللي هنسوقهم شمال

الفنانين..

ان كان ممثل ولا مطرب ولا شاعر

اللي يناصرنا هنمدحه بالخير ونذكر اسمه ع المنابر

واللي يعادينا ياكش ما يكون شيخ بعمة هنقول ده فاجر ولا كافر

والناس بتمشي ورا الخطب

والجهل ناره قايدة قايدة

احنا بس يا دوب هنرميله الحطب

*

تمام يا فندم!

كله متظبط ومتشيك ومتهندم يا فندم

هو بعد الناس ما شافت..

حد ليه وش يتكلم يا فندم

طبعا الاعلام بتاعنا.. وطني حر

احنا بس خايفين نفتح الباب للعيال لا الخيط يكر

دي سحابة صيف يا فندم.. هتاخد وقتها وعلى طول تمر

الرموز الاعلامية

الصراحة.. مية مية

وهي دي الديموقراطية!

احنا ما منعناش مذيع يطلع على القنوات وينقد ولا يشتم

احنا بنقفل القنوات يا فندم!

الشعب منحاز لينا طبعا

بالتمام

فنانين ومثقفين ومطربين.. مافيش كلام

ايوة طبعا غنوا لينا

ايوة غنوا لمصر طبعا..

يبقى طبعا غنوا لينا!

قالوا ايه؟

قالوا:

“(مصر) يا امه يا سفينة”

“(مصر) عايشة فى بحر هايج”

(واحنا ربان السفينة)

“تسلم الايد اللي ربت”..

“تسلم الكيكة العجينة”!

احنا مش فاضيين يا فندم للاغاني وللكلام

الكلاب هي اللي فاضية للنباح

اما احنا.. بتوع سلاح!

*

الشعر مصلوب على وتر الوريد

كفراشة دامت بكل محاجر العهر استفاقت..

نملة تشتم منساة الرسول وترفع الاحلام شعبا لا يريد

وجع على الابواب يكسر نابه

قل للسراب متى سيفتح بابه

فانا مللت من الحكايا كل ليل دون ان ياتي جديد

النيل اهات ورمز للجياع

خذ كل ما ياتي لتهدئة الضباع

واركض على الاسفلت واقتل طفلة

لا يعرف العشاق معنى عشقهم الا باوقات الوداع

الشعر مصلوب على وتر الوريد

وانا على المرسى الطويل

كماء بحر من حديد

*

وانا مية من نيلك يا بلدي

انا مش معاهم كلهم

ولانيش تبعهم كلهم

لساني فاكر مشية الكورنيش.. وايدك

وحشني رمضانك والفطور على صوت ادان (رفعت) وعيدك

وسط البلد وحشتني من غير الحواجز والحجارة

انا كنت بامشي زمان.. ماكنتش اعرف ان في الشارع وزارة

كنت باتحامى بعينيكي، وبايد حبيبتي، وبالسيجارة

كنت باتدفا اما باركب ميكروباص

عملت كل حاجة تزعلك.. لكني ماضربتش رصاص

وسط البلد نسيت صوابعي اللي اتهروا

نسيت سجايري الفرط وهدومي اللي دابوا واتبروا

يا عم يا بتاع الخطب.. يا عم يابتاع السلاح

هو احنا يعني يا اما نبقى سداح مداح..

يا اما تطغوا وتفتروا؟!

بزيادة.. لينا تلات سنين بتبيعوا فينا وتشتروا

احنا البلد!

احنا السند والمستند

احنا اللي قبل ما تبني سدك.. كنا سد

واحنا اللي علشان القنال.. كانت ضهورنا بتتجلد

احنا البلد!

ملعون ابو اللي ما داقش جوعي

وان كنت مش هاصعب عليه.. والله ما هاوريه دموعي

انا اقوى منكم

انا جدر ضارب في البلد دي غصب عنكم

يا عم يابتاع السلاح.. يا عم يا بتاع الخطب

تركتكو اصلا نخل شاخ.. ولا عادش بينزل رطب

انا مش طرف في خناقة الحكم اللي قفلت قلبكم

انا قلبي مؤمن ان ملك الله بيهبه لمن يهب

بس اوعى تفتكروا انى هارضى بجوع عيالي

او اني اشوف بلدي قصادي بتتنهب

والله معمولك عمل!

شعب اتنحس على نحس همي

شعب اتوقف على حرق دمي

ادب ايدي في غيط شعور

عشمان انول بدر البدور

يطلع لي شال امي

لو حد زعلان اني ثرت

اديني غرت!

بطلت ثورة وبطلت نيلة

وشلت على راسي التقيلة

مالناش يا عم نصيب نفرح بخلفتنا

ما يا ترضى بالمركوب.. يا ترضى بالفتنة

يا دوب شافوني عريس

نصبوا الطريق متاريس

وحاصروا زفتنا

هنداري ليه ونلف.. ونداري في الالاعيب؟

الاعتراف مش عيب

لو كنا شفنا الغيب

لا كنا قندلنا.. ولا كنا زفتنا

صعبان علي الحلم

شايفه بيتكسر

وعينيا طايلة المدى

بس الايدين اقصر

انا اللي عمره ما غاب

وعمره ما اتاخر

تطرح عينيكي مرار

يزرع عينيه سكر

انا اللي قال حاضر

لا شرط ولا اتامر

ولا طمع ولا اتدانى

ولا بطش ولا اتجبر

انا اللي كل ما اجوع

بعينيكي باتصبر

ما يغركيش العدد

والله.. انا اكتر

انا اللي مش اخوان

وانا اللي مش عسكر

• كلمات قصيدة المكالمة الجخ
• مكالمه ايه شاعر معا حبيبتي