ما باكتبش القصايد فيكي بالساهل
برغم ان القصايد فيكي تستاهل
وانا عمري..
ما كنت فحرفتي عاجز ولا جاهل
لكن ساعة ما اقول اني هاقول فيكي..
الاقي الحرف جوايا ما بين مقتول.. وبين قاتل
وعارفه.. كل دا من ايه؟
باحس ان الكلام عنك.. سحابه عالية فوق فوقي
وانا واقف على قلبي وعلى حبي وعلى شوقي..
وبرضه لسه مش طايل!
ولما يقولوا: “غنلها..
وقول الشعر ف عينيها عشان يرضى عليك نيلها
وتعدل بختك المايل”..
ارد بكل احساسي: منيش قايل..
يا مصر الشعر ف عينيكي ما هوش سطرين بيتقالوا
ولا موال بيتغنى وانا قايله ومتقاله
ولا شوية كلام شعارات بيتحطوا.. ويتشالوا
يا مصرالشعر ف عينيكي جبال عالية
وحمل تقيل..
يشيله ابنك الفارس
وانا لسه منيش فارس
لكن حاسس..
باني هابقى يوم هوا
ساعتها يا امه تبقى الكلمه من جوا
وابقى قد قول قلبي
وامد ايديا لايديكي
ساعتها بس استاهل.. اقول الشعر ف عينيكي
*****
***
*يا شايلة كتير على اكتافك
ومش همك.. وبتشيلي
وساقيه الكل من دمك
وبتقولي: “فدا نيلي”
يا ايوبه..
يا غالبه وانت مغلوبه..
يا نسمه ف عز صيف بارده
وحضن ف عز ليل طوبه
باحبك.. وانت مش غيرك
باحبك لماتبقي انتي
بطين الزرع وبخيرك
ف عشه صغيره سكنتي
باحبك وانت مش “هانم”
ولا لابسه الكعوب عاليه وماليه وشها احمر
باحبك وانت فلاحه..
ولابسه الحشمه والطيبه وعلى جبينك.. عرق اخضر
واحبك لما القاكي بتتوضي.. بمية نيلك الاسمر
وبتصلي على الترعه.. وفارده الكون مصليه
باحبك…
وانت مصريه
ماتبقيش واحدة منسوخه..
وممسوخه..
ف اخر الصف مرميه
يا امي ارفعي راسك ودوسي كل من داسك
وحبيني..
انا شعبك.. انا ناسك
اناارضك.. انا فاسك
انا العايش بانفاسك
انا العطشان لنقطة فايضة من كاسك
لا انا طمعان انول دهبك.. ولا ماسك
دا انا.. ماسك..
بايدي الجمر طول عمري
ولا خيبت يوم ظنك ولا كدبت احساسك
ولو عايزة.. اكون تاجك
واكون لو عايزة كناسك
واكون علمك..
واكون قلمك..
واكون حبرك وكراسك
واكون كرباج على ضهر اللي يوم غشك
وقرب ايده من وشك
وقال لك انه من جندك وحراسك
وع الخد اليمين ضربك… وع الخد الشمال.. باسك!
* * *
يا امي… حسي بوجودي
دا انا الكلمة اللي فوق سطرك
طب اعمل ايه عشان خاطرك؟
عشان خاطرك..
اكون مدفع..
واحارب في صفوف الجيش
واكون اجدع..
واحارب في طابورالعيش
ولو ينفع..
اعيش زي الملايكة هاعيش..
ولا اكل.. ولا اشرب.. ولااحزن.. ولا اغضب
ولو كان اللي جاي اصعب.. ولا يهمك
ما انا اتعودت يا (غالية).. على (الغليان)
وان الفاضي دلوقتي.. صبح بيصب ف المليان
وان المكسي عايز هدمة م العريان
وان سعادة الشبعان..
بيطلب لقمة م اللي مقضي طول عمره نهار رمضان!
انا اتعودت ع الدنيا اللي بالمقلوب
وع اللي بيته مبني ازاز لكن واصل
فيحدف حلمنا بالطوب!
* * *
انا اتعودت..
ع الجري اللي للمتاعيس
وع الزفة اللي فوق ارضي ومش ليا
وماشي فيها الف عريس..
وبنت بنوت..
حلمت ف يوم تكون ليا.. واكون ليها
حلمت اسكن على نيل رمشها الصافي
واقابل بكرة ف عينيها
حلمت بكل شيء فيها
وفجاة الاقي احلامي..
سما عمالة بتمطر سيول كوابيس
فاقوم من نومي من فزعي
الاقي الصبح بيشقشق على وجعي
يصحيني بكا الاشعار
فاغسل وشي بالاخبار
واحضر من همومي فطار..
يكفي قلبي طول الشهر
وابلع لقمتي.. بالقهر
ولما اشبع من الاحزان..
ابوس على ايدي وش وضهر
واقول.. نعمه
هتفرق ايه.. نشوف الدنيا او.. نعمى؟
يا مصر القلب مش قادر يشوف غيرك
ولا قادر ينول… خيرك
ولا قادر.. يكون من غير جناح طيرك
لكن برضه بيستحمل يقول.. عادي.. ولا يهمك
انا اتعودت يا غالية.. فمدقيش
ما انا هافضل كده عايش على امل اني بكرة هاعيش!
واقضي عمري مش فارقة..
الاقي اللقمة.. او ما الاقيش
وانام برضه جعان.. لكن…
اخاف احلم…
بسوق العيش!
