سنورد لكم في هذا المقال بعض الابيات الشعرية باللهجة العراقية التي تتحدث عن الغزل.
هو: اشلونچ يا اعز
الناس عندي
هو: الكلب چم احبيبه عنده
هي: هزني الشوك
عالموعد اتانيك
واعد بيدي الدقايق
وحدة وحدة
وحدة اثنين
هاي الثالثة تروح
اتاني وصار هالموعد اشبعده
نمت حسبالي
اشوفك بالحلم جاي
وكلت دمعاتي احطهن وسط خده
هو: نمتيه نيالچ غفيتي
وانة ليلي يمر على
عيوني صبح
الينيم وردة ويمسد عليها
مو مثل ليلولي وينيم جرح!!
والغفة بكلمة محنة
مو مثل اللي ينام وبعينه ملح!!
هي: لا حبيبي
انه هذا الليل من يمرني دمعة
وحزن واشواك وحنين
انه عيني عليك ما بطل دمعها
تبچي ما تسكت العين
هو: لا لا تبچين
امسحي دمعتچ
وارجوچ لا تبچين
يل دمعچ جمر
وخدودچ احلى ورود
خايف على اخدودچ من دموع العين
لا تبچين
وردة وتحترك ما تحمل النيران
يذبل كل وركها وتستحي من الطين
هي: وانت تكلي لا تبچين ؟
مو عمري انتهى وايامي كلها تروح
لو راح العمر متكلي اجيبه منين؟
هو: لا تبچين
المن بعد المن تسوه دمعة تطيح
هو ايش باقي بينا
ونحترك كل حين
تعبنا القهر ممشى جزيرة وخوف
صار الماضي غلطة وچنة غلطانين !!
لا تبچين لو يسوه العمر يمكن بچينا اسنين
هي: اشلون اتكلي لا تبچين
هو: لا تبچين !!
هي: تدري انت اللي يحب
ما يكدر اعله النار
ويا نار اللي بيه اتفزز الميتين
احتاج الدمع من ما اشوفك يوم
لان يصبح علي اليوم خمس سنين !!
حبيبي لخاطري
لا تبتعد ارجوك
ما احمل فراكك
تدري كلش زين
هو: بس ارجوچ لا تبچين
خوفي انه عليچ من الدمع والله
مرات الدمع
ياخذ حلاة العين
ويل كلچ ترافه ارجوچ لا تبچين
ما احبك جذب صدكني ذايب بيك
واذا ادور عليه بيك تلكاني
واذا هذا الاكوله تظن ابالغ بيه
تكدر تنسحب بس تكدر تنساني
وما اكلك جذب كبلك ما حبيت
بس يوم اللي عرفتك انولدت من ثاني
وهسه اني طفل ما يعرف يضم اسرار
وتلكه البلكلب بسرعة على لساني
احبك كلمة ما تستحقه والله
لان كلمة احبك ما تروي وجداني
وما تهمني حروف الكلمة من تنكال
بس همني الفعل وشتحمل معاني
لان انا من احب اختلف عن الناس
وما اكلك طبع ولا سر رباني
ولا اكلك ملاك اني يفلان
بس تلكه الصدك من تدك بيباني
احبك كالوهه كبلي هواي
وبيه ما اهم واتركه تعاني
عندي لهفة الك شايله من سنين
واظن كلمة احبك ما تطفي نيراني
ما معقول اعوفك وانا لسة اهواك
ماهو انصاف هذا وانا ما قبل
خلص كل شبابي ويا غيرك راح
جاوينك ولك ما جيتني منول
ولو انا اعتقد هذا الجمال البيك
من ربك هبة وما صانعك معمل
خليلك ثقة وخلي اكلب بيك
وتركني بمزاجي كون ما تزعل
اوصفنك وصف ما يخطر على البال
بس كون بشرط كلشي احجي تتقبل
شعرك من تحلة ايتيه الخيال
والوادم غفت جن ليلهم جلجل
وخدودك اشارة وكف بيها السير
ورموشك سنابل عوزهن منجل
حزورة الشفايف وانحجت للناس
وما واحد كدر الهسة يلكى الحل
بياضك مو طبيعي ما حواه مخلوق
تعكس بيه الصورة اطلعك اجمل
احط عيني اعلة صدرك ونضر المكفاك
حتى الدم اشوفه شلون يتحول
كصت شعرها الخلك بس مو مثل كصتك
وما شفت بين الخلك طولك ولا كصتك
جن انتا ولا انس كلي شني قصتك
عجبني طيفك معاي يبات عجبني
وكلما اروح بدرب الكاك عاجبني
تدري انت شنهو الفتني وبيك عاجبني
عاجبني كلك حلو من جدمكلكصتك
