قصيده بالف قصيده .. شموخ وعزه وكبرياء
معنى على معنى .. و طرق و تراكيب
همي و تفكيري و صوتي و قافي
عزله عن العالم .. و حزن .. و مصاليب
دمع و سكوت و قطع وصل و تجافي
ليلة قصيد .. يرد عنها الاصاحيب
و على انفراد .. اتباح فيها الخوافي
يا هابس .. الدنيا متاهة سراديب
ماهي على ظنك .. سحاب و فيافي
شف رجفة كفوفي على طارة الجيب
تنبيك عن رجف الضلوع الروافي
شايب ولو ما بان في راسي الشيب
الشيب في جوف المعاليق ضافي
في كل مره تشرق الشمس و تغيب
و انا على وضعي .. جفافي جفافي
ان شفت بوجيه العرب لي تراحيب
ما شفت بقلوب العرب لي مصافي
بعيونهم كلي عيوب و عذاريتب
و اصدق عذاريبي .. سبب لاختلافي
هذا زمان الكذب و الغدر و العيب
ما هو زمان يعيش فيه السنافي
ان جيت اغني يقصر القاف .. و يشيب
و ان جيت انام الليل .. يقصر لحافي
و ان جيت اسولف للجروح المعاطيب
اعطبت فيني كل جرح متعافي
ضاق الحشا .. و الصمت يحتاج ترتيب
و انا على صمتي كتبت اعترافتي
الارض مالت .. و الفضا وضعه مريب
و اربع جهات الكون .. سجن و منافي
اكتب و لا ادري وين اودي المكاتيب
الموت قدامي .. و عمري خلافي
يارجل سجي فوق روس المراقيب
من قبل اسوقك للبحر و المرافي
ويا راس و ان دارت عليك الدواليب
عن طيحتك .. تفداك روس الهرافي
ما طوعني زاهيات الجلاليب
و لا اكسروني لابسين القحافي
ان مت .. موتي من كبار المكاسيب
و ان عشت ..( حر ) بوقفتي و انصرافي
