الغزل في الشعر البدوي
بعض القصائد البدوية الغزلية:
ودي بك وابيك واباك وابغاك
جمعتها لرضاك واختار فيها
شف ويش منها يتبع احكاك ورضاك
واللي لك اسقي مسمعك لا ضميها
غديت (افر)احكاي واساير احكاك
وانا تشرف لكنتي واهتويها
مضمونها ودي بشوفتك واهواك
ياللي دروب اهل الردى ما تجيها
صانك ولي امرك وحبك وداراك
ولا قدر ردع الحظوظ ومجيها
نفسك مهذبها وعز الله رباك
مايدري ان جيش الهيام يغزيها
الله قسم يبلاك بي وانت يبلاك
باللي سواتي في العرب يرتجيها
محبة (ن ) ذربة من القلب تكساك
محبة (ن) صدق الهوى يكتسيها
يامرك قلبك بالوفا لي وتنهاك
ناس (ن) على لاماك تفرك يديها
رزين عقل ومن مزايا مزاياك
نفسك تحب وعفتك تمتطيها
تطيع عقل (ن) ما بعد زل واغواك
مشاعرك تعصاه، وانت تعصيها
ما شفت منك الا عيونك ويمناك
محبة (ن) راع الردى ما يبيها
يقبض فؤادي لا تخيلت فرقاك
ياشف عين (ن) ما سواك يعنيها
ويا عزوة اخوانك ومطلب هذولاك
ناس (ن) محبة والدك تدعيها
ناس (ن) تخدم ابيك كله لعيناك
وهو يحسب ان الله عليه يهديها
يا جعلها تفدى على الارض ما طاك
والله بمن هو مثلها يبتليها
لكن لعب في يا وليفي تغلاك
ونفسي غلاك من الصدود يحديها
تبطي علي وانا هنا واتحراك
وكبدي لو اهيب الصبر تشتويها
واجمع علومك امن هناك وهناك
ووالله لو انها تنشرى لا اشتريها
وعذرك انا لا هي) يا ويش اللي الهاك
لاا هي ومر(ن)منت لاهي تليها
كانك مشكك في الوفا والغلا هااك
جوالي اقر القائمة كل ابيها
رقمك مع (الصادر) ولا (وارد ) اسواك
والناس في اللي ( لم يرد عليها ).
واياك واياني…واياني اياك
ومن غيبة (ن) من دون عذر يحميها
نويت مرباع الغضي سيد الاحباب
قصدي يزول الجرح زاد التهابه
جيت وبقايل نارهم حول الاطناب
بيت الشعر مطوي وباقي زهابه
اقفت ركايبهم ومني الهدب ذاب
الدمع يسري والذهل بالاجابة
على غزير الدمع ضميت الاهداب
صديت لين لين الدمع يقفي سحابة
بعض الوجع يمكن تداويه الاعشاب
وبعض الوجع يا ويل من هو سطا به
عشق بدوي لا حب ما هو بكذاب
يوفي ولو جرحه تجدد صوابه
واليوم وصلت بيننا مثل الاجناب
ذاك الغلا يا ضيعته يا سفابه
باكر اذا جينا لهم مثل الاغراب
من عقب ما كنا الاهل والقرابة
الامر لله كل شي له اسباب
ولا الهوى وش لي على ما اهتدى به
وشلون قلبي ما يجي اليوم منصاب
على الكتم منقوش بعض الكتابة
حتى اثر مشيه مع سهول وهضاب
مر يجيه ومر ما يندرى به
قلبي من الفرقا صويب ومرتاب
كنه غدى صوين من هول ما به
حزني عليه انه تسبب ولا طاب
نظرة طبيبة عجلت في ذهابه
ريح الخزامى والنفل زين الاطياب
يشدني ريح السمر في ثيابه
لا اقبل نسيم به خيل وركاب
وله في طلوع الشمس عز ومهابة
قصيدة بدوية اخرى
بديت لي بابيات شعرن جديدات
وفوق السطور اكتب بيوتن جدادي
اونست يا مشكاي بالصدر ضيقات
وان قلت راح الضيق بالصدر زادي
طرا علي اللي عيونه وسيعات
اللي مشاركني بنومي وزادي
وما ظني انسا اللي رموشه ظليلات
وانا ليا منه طرا وااااااهجادي
قضيت مع خلي ليالي جميلات
انا مفادي واهو مثلي مفادي
واخذت انا وياه بالحب سجات
في عشرتن ماهي بعشرة فسادي
لكن حدتني في زماني غيارات
وعيا يحقق لي زماني مرادي
حب وراه فراق ما فيه لذات
مثل البياض اللي غشاه السوادي
وصحيح ما قال المثل والروايات
ما تعقب النيران كود الرمادي
وخلصت مالي بالمحبة هوايات
وزرعن زرعت اصرم وجاه الحصادي
ما هو صحيح الحب كذب وخرافات
ان كنت ماني يا اهل العلم غادي
الحب بدعة ما نزلت فيه الايات
ولا قريناله حديثن وكادي
من بعد حب دام خمس سنوات
صارت نهاية حبنا شي عادي
قصيدة غزل بدوية وحضرية
الحضرية
قلنا سلام الله يا راعي الرعية
وين الطريق اللي تودي للبلد
معنا غشيم ما عرف قيمة خوية
ضيعة بقفار ما فيها احد
البدوي
يا هلا ويا مرحبا بالنرجسية
اقلطي فالدار دارك والولد
ذيك خيمتنا ولا انتي بالخلية
ولك امان الله في يوم الاحد
الحضرية
ما لنا مجلاس يا رجل الحمية
مثلنا لا غاب لحظة يفتقد
غير ذا الهندي عساه اليوم حية
لا عرف درب ولا هو اللي نشد
البدوي
ان جلستوا مرحبا ضيوف علية
وان تعذرتوا معك طير السعد
ما يجوز الغصب لك ونتي بنية
لكن العودة ولازم من وعد
الحضرية
ان عطاني الله عمر ولي بقية
لازم ارجع مع هلي لك يوم غد
وان تفارقنا تذكرك المطية
وجعل يخلفنا على ديارك رعد
البدوي
ليتني هندي معك يا الغشمرية
وان ذالهندي في المفلا قعد
ليتني وياك نرعى بالرعية
او ليت قلبي خبل لا رحتي هجد
الحضرية
الله يخليك ما ني ببدوية
ما نقصني يا ولد هم ونكد
دلنا على الخط دام الشمس حية
لا دنانا الليل ذالهندي رقد
البدوي
ذاك دربك من ورا ذيك الحوية
واستري وجهك ولا تبديه ابد
وان بغيتي تحطبي مالك لوية
اجعلي بيديك حبل منمسد
- شعر بدوي عن الصباح
- شعر مساء الخير بدوي
- شعر غزل بدوي
