كرهتك قد ما ضحكتى على شقايا
كرهتك قد ما امى تحب رؤيايا
و قد رعشة ايدى وانا بكتب
اول قصيده اكتبهالك
اخر قصيده اكتبهالك
و اخر قصه فى كتابك
و اخر كلب فى كلابك
و اخر طيف يبات الليل على بابك
دا انا اللى كسرت السهر
و رقصت ويا الليل و رقصت القمر
انا اللى فضيت بكر نجمه فى السما بكيت نجوم
و طلقت ايدى فى صدر نسمه اتلخبطت بين الغيوم
انا الجخ و سامعه عنى و عارفه انى كل يوم
كنت قبلك ويا واحده و يمكن ويا اتنين فى يوم
تكسرينى؟! … لا يا عينى
انتى واحده من الوف
و ياما وانا عايش هشوف
انتى مجوعة قصايد بالمحبه بتبتدى
وهى دى
اخر قصيده اكتبهالك
و كان بودى اسمعهالك
نبرة الحزن فى كلامى مش ندم
ما انا خدت منك كل حاجه وسبتلك حبة الم
انا خدت منك كل شئ
و فضلت قدامك برئ
كل ما فى الامر انى لسه ماشبعتش خيانه
تعرفى يا نانا الخيانه؟
مش خيانه تحبى غيرى .. يا خى حبى غيرى
همشى مع واحده تشوفيها و زى ما هغير انتى غيرى
مش خيانه
بس تبقى خيانه عظمى
يوم ما يبقى الحب كلمه
يوم ما تبقى مالبدايه
حاطه للقصه نهايه
يا ترى لساكى فاكره؟
فاكره يوم ما رميتى قلبى بنظرتك قلبى اتجرح؟
كان فرح
انا لسه فاكر.. كان فرح
كانت الرقاصه بتزفلى حبك
قلت احبك
يمكن الحب يداوينى
وادى ادينى
بكره اليوم اللى شفتك
بكره الشارع بكره الليل اللى ضمك
بكره القمره اللى بتفكرنى بيكى
و بكره اسمى اكمنه اسمك
بكره انى ابتسم
حتى اترسم
حتى اتدفن
بكره البحر اللى زغزغ صدرك السقعان فى حضنه
جيتى حضنى
حتى حضنى بكرهه لما اتسعلك
بكره الشعر اللى خللانى ابقى نعلك
بكره القلب اللى سابلك صولجانه و بكرهك
واللى زانك طول سنين
جه الليلادى و شوهك
لا انتى ناعسه ولا انتى عبله ولا انتى شملوله الخجوله
اتكسر جوايه صوتك واتكسر جواكى عمر
بس عمرك هو عمرى
كان بودى اسيب فى قلبك ميت اتون من طين و جمر
بس قلبك هو شعرى
بكرهك…
ياللى ابتسامتك فرحتنى
و مرجحتنى و زحزحتنى
و كبرت…
الله اكبر
من كلامك من غرامك من عينيكى السودا ليل
قلبك المكسور بيعلن لانتصارى ميت دليل
و انتصارى مال على ودانى وهمسلى
قاللى “اوزولد” البرئ ما بقاش برئ
قاللى ان “سيزيف” دا زيف
و ان قولة اه بتطلع مالصعايده فين و فين
قاللى انساكى فى مساكى
و اما اشوف قلبك عساكى تفوقى من وجع البنات
قالى بالرغم انه عارف انى حبيتك.. هجيتك
و انه شافك كاتبه اسمى بخط نونو تحت بيتك
قاللى شافك عالمرايه بتكشفى صدرك لصدرى
قاللى صبرك.. يا دى صبرى
اياك فاكرنى من حجر
اللى قاسى فى حب نانا لو حجر…كان انفجر
كنا زى اتنين فى صحرا
ما فى ناس ما فى عيب مافى خوف ما فى بكره
كنا خيل وليل و مهره
كنا سكر و كنا فجر و كنا سهره
كنا نتواعد بكلمه و كنا نتصالح بنظره
كنا لما تسافرى او اسافر
يصير الليل مالوش اخر
اكن عيونك النعسانه مجافيينك
و اكلم نفسى طول الليل و اقول فينك
و كان قلبى بوسع البحر..لملم موجه فى سفينك
و نفس البحر دلوقتى لعنلك ميت سلسفينك
لا عاد موجه بيهواكى
و حتى نجومه فى سماكى
رموكى بعد ما رماكى
و كانوا فى ليلة تفينك..
و كانو يناموا فوق مريلتك الكحلى
ينقولك هدومك يوم ما نكون هنتقابل
انا و نانا فى طول ايامنا ما كنا بنتقابل
ما كل الناس هتتقابل
احنا كنا..
احنا كنا..
والله ناسى كيف ما كنا
بس كنا
يمكن الحلم اتقتل بس الجبل
لو هده ريح او حتى مال برضك جبل
و انا مش جبل من طين وقش ولا عضمى هش
ان كان على القلب اللى حبك اخره نعش
و انصبله بدل الخمسه الف
و يبقى مات ولا اتخدعش
كنت كيف السبيه بيه
و كنت ليكى عبد طايع
صرت ورقه و حبر ضايع
وقت فات ولا جابش عايد
مش بقولك..
انتى مجموعة قصايد
لمى ورقاتك خلاص الحبر جف
و احكى للجيل اللى طالع بكره يضحك
قولى لابنك فيه زمان واد عقله خف
اوعى لتصيدك بنيه و زى فرحه يولى فرحك
شيلى عمرك باللى فيه
خدت منك كام قصيده سامحى فيهم
حق كرسيين معسل مش حكايه
خدت من عمرك بكايه
و ابتسامتى سيبتهالك
يكفى انى لسه مالك نفسى و بخبى البكا
شوفى شاعر غيرى يوصفلك جمالك
اما عالقلم اللى فى ايدى
شاريه من دكان صعيدى
راسه الفين دومه نيه لانسى حبك من اساسه
عشتى طبعا فى الصعيد و عرفتى ناسه
يبقى اسهل شى عليا
انسى حبك و انسى حالك
وانى اقول عالقصيده ديا
اخر قصيده اكتبهالك
- هشام الجخ اخر قصيدة اكتبهالك mp3
- هشام الجخ اخر قصيدة اكتبهالك
- اخر قصيدة اكتبهالك
- اخر قصيدة اكتبهالك mp3
- تحميل هشام الجخ اخر قصيدة اكتبهالك mp3
- هشام الجخ اخر قصيده اكتبهالك mp3
- قصيده هكتبهالك هشام الجخ
- تحميل اخر قصيده اكتبهالك mp3
- تحميل قصيدة اخر قصيدة اكتبهالك mp3
- تحميل قصيدة اخر قصيده اكتبهالك
