بحبك يا مصر وبعشق ترابك
والف المداين وارجع لبابك
واحس بكياني وكرامتي فرحابك
يقولوا فقيرة
يقولوا اسيرة
بشوفك اميرة
واحبك يا مصر
بحبك ملايه ومنديل بقويا
مقالب من اختي وغتاتة من اخويا
ودعوة من امي تنسيني همي
وحكمة من ابويا
واحبك صبية على البحر جاية
في ساعة عصارى
ونسمة قبالها تطير في شالها
تبين جمالها وترجع تداري
واحبك مراكب تعدي اللي راكب
لبر الامان
يدوب جوا نيلك ويعطش يجيلك
يقول لك كمان
واقابلك ببوسة في زفة عروسة
ولمة في بيتنا
مع ولاد حارتنا
تدق المزاهر ترد المزامر
تزغرد جارتنا نهلل نغني
وحلم التمني ينور ليليتنا
واحبك زيارة لبيت عم سيد
ده اصله فقير مش حيقدر يعيد
نعيد عليه نفرح عنيه
ويدعيلنا دعوة بمليون جنيه
في ارضك يحس الغريب
انه مصري واحنا الاجانب
ويلقى الرعاية
ويلقى الحماية على كل جانب
ويمشي فربوعك
ويشبع بجوعك ويعمل مصايب
ويرحل وينسى جميلك
ويقسى ويطلع يعايب
ويرجع تسامحي
يا ساكنة فملامحي يا ست الحبايب
ولادك بنوكي بروحهم فدوكي
ويشهد عليهم ترابك في سينا
ومنهم باعوكي
عشان الشيروكي وفيلا فمارينا
يعيشوا في خيرك
ويدوه لغيرك ولاد الذينا
ولو جار زمانهم يعودوا لمكانهم
يلاقوا السكينة
وتنسي جحودهم
وتبكي عليهم عنيك الحزينة
في ارضك سرحت وفشلت
ونجحت وعشت ببساطة
صاحبت الحمام
ونمت فسلام ولو عالبلاطة
تغير في شكلي همومي
ومشاكلي لكن روحي لا
اعبر بغنوة واقول نكتة حلوة
لكن ياس لا
ما طيقش الغتاتة
وقلبي المسالم ما يعرف شماتة
واقول بالتلاتة
بحبك بحبك بحبك يامصر
