كان شعري و انا صغيرة طويل و ناعم و كثيف من فضل الله ثم عناية
الوالدة الله يحفظها
خلصت الثانوية رحت الصالون ( تسمونه بالسعودية المشغل ) و قصيت شعري كاريه و هو
كان اطول من ظهري بشبر على ابو انه تغيير و مليت من الشعر الطويل ،
صار فيني فقر دم طاح ثلاث ارباعه ،و بعد فترة اهلكته بالصبغات اشقر و بني
و ثلجي لما اندمر و كنت بعد ما اتسبح انشفه بالسشوار يعني حرقته عدل!
استخدمت شامبو لوريال كريستاس و كريمات و سبريهات و لا في اي فايدة، وقت استعمال
هالمنتجات شعري يصير حلو ، و ثاني يوم من الاستعمال يرجع نفس ما كان ،
عرفت انه هالمنتجات فايدتها مؤقتة و لا تفيد الشعر باي شي
بيوم من الايام وقفت وقفة جادة مع نفسي و قلت الشعر تاج الجمال و انا
شبه قرعة لازم اعتني فيه و ارده نفس ما كان
فتحت النت و فريت بالمنتديات ، قمت اسال صديقاتي اللي شعورهم حلوة ، دردشت مع
حريم كبار
لما وصلت لبرنامج معين و طبقته على نفسي و الحمدلله النتيجة مرضية و و الله
يا بنات شكلي كله تغير بعد ما اهتميت بشعري
ادري طولت عليكم السالفة ، الحين بقولكم اشسويت
1/ الصبغ
شعري كان اشقر بخصل ثلجي و الصبغة نازلة لي النص و انا مقررة ما اصبغ
، صار عندنا عرس رحت صبغته شوكلاته ( جوكلت ) يعني غمجته و توووووبة من
الاشقر و الصبغات
خفت الصبغة و نزلت شوي شوي
2/ قص الشعر
قصيت الاطراف الميتة بالصالون ، و كل ما تبدي تطلع اقصها ، مع العناية بالشعر
بتلاحظين انها تاخذ شهور على ما تطلع ، و انتبهوا يا بنات عاللي تقص شعرج
، لا اتقصين عند اي وحدة ، لازم ايدها اتكون مباركة ، في كوافيرات ايقصون
الشعر و ما يطول الشعر بعد ايدهم ، و في كوافيرات ايدها تاخذ عالشعر اتقص
بدون لا تسالج لي وين تبين طوله ، يعني تكونين فرحانة انه وصل لي نص
ظهرج تقوم اتقصه لي كتفج
3/ الدهن
بديت ادهن شعري ، الزيوت اللي انا احبها و تناسبني ، حطوا تحت تناسبني 100
خط ، مو بالضرورة يا بنات اللي يناسبج يناسب غيري ، اشلون اعرف اذا تناسبني
و الا لا جربيها و اذا ارتحتي عليها خليج عليها و لا تقطعينها ، لان
كثرة تبديل الزيوت هي اللي اطيح الشعر
الزيوت اللي استخدمها : الخروع و اللوز و زيت الزيتون و زيت جوز الهند (
براشوت )
اخلطها وقت الاستعمال على شعري ما اخلطها بعلبة لا
اللوز و الخروع هم الاساس عندي و انا اخففهم يا ببراشوت يا بزيت زيتون
لاحظوا هالزيوت اللي استخدمها زيوت نقية ، يعني انا ما ناسبني دابر املا لانه من
مكوناته عطر و صبغ ، دابر زيت مركب مو نقي هذي وجهة نظري ، و
كل وحدة و اللي يناسبها ادري انه في بنات استمروا عليه و خلى شعورهم للركبة
في البداية شعري كان نااااشف كنت ادهنه تقريبا كل يوم و لما تحسن صرت ادهنه
3 مرات بالاسبوع
ساعات ادهنه 3 ساعات ، مرات اخليه يطول اكثر ، بس لقيت انه شعري يصير
جناااان لما ادهنه باليل و اغسله الصبح، ملاحظة ادهن اطراف شعري بدون الفروة لان فروة
راسي دهنية ، و شعري ناشف محتاج زيوت
4/ الشامبو
بالنسبة لغسل الشعر : ما اغسله بماي حار ابدا ، الماي يكون فاتر افضل
الشامبو اللي استخدمته : هيد اند شولدرز يناسب فروة راسي ، بس عيب هالشامبو انه
ما اتكثرين منه يعني مرة بالاسبوع و الا بينشف شعرج
الحين شريت لي شامبو من الصيدلية ماركة rausch انا اخذت شامبو بالبيض و اختي اخذت
شامبو بالافوكادو
هالماركة سويسرية و منتجاتها طبيعية ، شامبو البيض ريحته مو حلوة بس ما اطول بالشعر
5/الحناء
الحنا يا بنات اتكثف الشعر و تصبغ الشيب و اتشيل القشرة و تقطع الريحة، و
للدلوعات اللي يقولون ما نحب ريحتها اقولهم حنوا مرة و مرتين و راح تعشقون ريحتها
، الحنة صج هي اللي تحلي ريحة الشعر ، جربت الشامبوات و الماسكات المعطرة ،
ما لقيت نفس الحنة هي اللي تحلي ريحة الشعر
اول شي يا بنات لازم تشترون حنة فريش و نظيفة مو مخلوطة ، عاد ماشالله
بالسعودية افضل انواع الحنة موجودة
الحنة اعجنها بطاسة قزاز ( بايركس ) و ماي دافي و اخليها ثقيلة مو السايلة
و لا المتماسكة ، لا يعني اخف من الروب ، و اخلطها بخلاطة العجين او
خفاقة البيض و الله ما ادري شسمها و اغطيها بالنايلون الشفاف عشان لا يدشها تراب
و اخليها اتخمر ، افضل مرة حنيت فيها شعري كانت الحنة متخمرة فيها 12 ساعة
الاضافات للحنة كثيرة و كل وحدة و اللي يناسبها ، جربت اعجنها بماي الكركديه ،
مرات كنت احط عليها رشة قرنفل ( مسمار ) للامانة هو حار عالشعر يعني اللي
ما اتحمل الحرارة تننبه، حطيت ملعقة روب مغذي للشعر ، عجنتها بماي الشاي ( يغمج
الشعر ) ، حطيت ملعقة سدر ، المهم كل وحدة و اللي يناسبها
مرات كنت احني شعري بالصالون ، و لاحظت انه شعري من الامام نبت ، راقبت
الفلبينية اشلون اتحنيني ، شفت انها لما اتحط الحنة كانها تمشط شعري باصابعها او كانها
اتحك شعري بالحنة
ركزوا عالحنة يا بنات بهالفترة لانه صيف و راح اتبرد على روسكم ، و بالشتا
البارد اللي قام يجينا صعب حيل الوحدة اتحني ، و بوقت الدورة الشهرية لا اتحنين
شعرج نهائيا مو زين ، و ضروري تلبسين قفازات نايلون و انتي اتحنين شعرج ،
مو حلوة البنت لي مدت ايدها و الا لون ايدها و اضافرها برتقالي ، نعومة
الايد و بياضها حلو و يحلي البنت كلها ، و امسحي الحنة اذا سالت على
اذنج او وجهج بسرعة
- قصيت شعري كاريه
