قصيدة الثورة فين ؟
صباح نضيف يامعلمين .. صباح شريف .. سؤال خفيف ..الثورة فين ؟
الثورة فين ؟
الثورة قامت امتى طيب حد فاكر ؟ يوم التلات ؟
طب حد فاكر اسم حد اتصاب ولسه عايش او حتى مات ؟
طب حد عارف اد ايه اللي اتعموا ؟ طب حد فاكر اسم واحده من اللي
ماتوا من البنات ؟
طب حد فاكر الغاز والعياط ؟
طب حد فاكر نومنا قدام المجمع ع البلاط ؟
حد فاكر اللي ماتوا في الانفلات ؟
طب حد فاكر اي حاجه من اللي فات ؟
حد عارف هم ودوا الثورة فين ؟؟
لو سمحت الثورة فين ؟
الثورة وياك يابن عمي ؟
عندك يابويا ؟ عندك ياامي ؟
معاك ياكابتن ؟ كانت هنا مشفتهاش ؟ شبهنا ولابسه زينا ملمحتهاش ؟
الثورة اهي ؟
ايوه صح الثورة اهي ..
بس لابسه الميري ليه ؟ !
هي لابسه الميري ليه ؟ !
الثورة لابسه الميري ليه ؟!
قطعولها لبسها ولبسوها الميري ليه ؟ !
هم العسكر خطفوا الثوره ؟.. ولا يكونشي الثورة دي عوره ومخبيها الشيخ اباري ؟
ولا يكونشي الشيخ اباري هو وشلة جيش النورة .. متفقين يتقاسموا فداري ؟
ولا يكونش كمان الثورة تبع التجنيد الاجباري ؟
في حد ياتمن العساكر ؟ طب يابني ذاكر ..
ماقالولنا ثورة وبردوا ركبوها العساكر
والعساكر لما مات العسكري بردوا ركبوها العساكر
والعساكر لما قتلوا العسكري وسط العساكر بردوا ركبوها العساكر
واللي فاكر ان ثورة مصر قامت فانتهي حكم العساكر مش مذاااااااااااااااكر
والعيب لا علي العساكر.. ولا ع اللي بيعبدوهم .. ولا ع اللي مغيبين ..
العيب عليكي .. العيب عليكي ياثورة المؤدبين
وبتسالوني الثورة فين ؟
لم تدرج في التسجيل
الثورة كانت في الميدان زي النهاردة ..
وانطفت لما جه الغربان ولما النسر عدى ..
ضحك علينا النسر وقال …… هيحمينا ..
غلابة احنا وسلمناله ونسينا ..
ومتنا احنا .. ولسه الدم فادينا ..
و النسر والغربان خانونا وقاموا بالثورة المضادة ؟
وبتسالوني الثورة فين ؟
الثورة فجيوب العساكر .. ولا عزاء للكتيانين ؟
الثورة فادين اللي بيبيحوا الدياثة .. وبيقولوا دين ؟
الثورة ناسها متمرمغين في الطين ..
الثورة قاطفين وردها
الثورة هاتكين عرضها
الثورة احنا معاها والعساكر ضدها
الثورة لو بتحبها .. رجعها من ايد الغجر والسفاحين ..
الثورة فين ؟
الثورة قام بيها الشباب الطيبين ؟
وحصد كراسيها اللي كانوا منفضين ومانتخين ؟
واللي ماشيين بالجذم جوه روسنا من سنين ؟
…………..
اغبيا والغبا ..عند بعض الناس هواية وموهبة
حطوا روسهم بين سنان العقربة
وبالاماني بيحلموا وبالامل مستنيين ..
متغيبين مش طيبين متغيبين
…………….
لم يدرج في التسجيل
متعلموش ومحرموش من العساكر ! وعمالين يهلفطوا ويكفروا ويهلوسوا
تقولهم انا اخوكو … دول طول حياتهم بيبعوكوا .. ولا حد فاكر .. طب البسوا
تقولهم العسكري عنده خازوق بيانتكه ويهندسه ..
يغضبوا ويكفرونا يقولولنا عيب بس اخرسوا ..
العسكري يارب ربنا يحرسه ..
طب مرتاحين ؟!!!!!
اهو نصنا قاطع وبيموت في الميدان .. ونصنا في البرلمان .. نواب ورق واتقرطسوا !
يلا البسوا ومتسالوش الثورة فين ..
اه يابلد تدي الفرص لحورتجي
اه يابلد فيكي الشهيد بقه بلطجي
والسفيه عامل مناضل ثورجي
واالثورجي بيقولوا عنه مستفيد واونطجي
وبيحكمك حبة عجايز عيانين
جاوبيني قولي الثورة فين ؟
اه يابلد عاشقة اللي داسك
اه يابلد ملعوب فجدرك وفاساسك ..
ناسيه اللي كان بيموت ووطي علي ارضك وباسك ؟!
بتبعينا ؟!
بتبعينا وتحضني فكلاب ياطيبه بيقتلونا .. ياطيبه دول اخرهم يبقوا دواسه لمداسك ؟
احنا حراسك ياطيبه احنا ناسك
ناسيه خالد ؟ ناسيه مينا ؟ ناسيه بسيوني وبنونه ومصطفي وسالي وحسين ؟
اخييي ياطيبه
طب فاكره مين ؟
ياطيبة قولي الثورة فين ؟
ياعالم هو ذمب اني بالحرية بحلم ؟ هو ذمب لما ادافع عن كرامتي ؟
ذمب اقول للي حاكم ارضنا .. مش هنقبل فينا تظلم ؟
ذمب اقول للي هاتك عرضنا .. انت مجرم .. ؟
هي ناس بتموت .. وناس تحكم ؟
هي ناس تتعمي .. وناس بالعمي تتحكم ؟
و ناس بالدم تتغطى وناس بالدم تتوضي .. ؟!
وناس للقبلة بتصلي .. وناس للمجلسين تحرم ؟!
وناس بتموت عشان غيرها .. وناس كسلانه تترحم ؟!
يارب ياللي من العباد احكم .. احكم ..
يارب اخوبا مات .. واخوبا التاني بيقولي ياكافر ياللي مش مسلم !
واختي عراها اليهود .. اختي عراها الجنود .. واخويا فعرضها اتكلم ..
واخويا بيتعمي وبيشوف ..
واخونا بيرتعش م الخوف شايفنا وشايف الظالم لكنه كفيف
اخويا اعمي وكمان ابكم
اه يابلد فيكي الشهيد مجرم
اقولك نفسنا نجيلك .. اجيلك الاقي بيني وبينك عسكري محرم !
نثور ماسكين قناديلك .. نجيب احلامنا ونجيلك .. وفرقابنا بنحنيلك .. وبردوا قفانا يتعلم!
بسيطة هثور تاني وهتعلم
وهربط جرحي واتالم بسيطة
هثور تاني واموت تاني وهفرد روحي ليكي طريق وعضمي مرتبة وسلم بسيطة
هلم فجوفي احباطي هقطع كل ابياتي وهكتب ليكي شعر جديد بدمي ياطيبه ع الحيطه بسيطة
هكمل .. ولو ايدي فرجليا وفرقبتي بالف كلبش مربووطة بسيطة
هكمل .. ولو اعمى ولو محبوس .. ولو هتدوسني كل مدرعات ابليس .. تدوس
ولو فوق راسي الف سلاح.. ولو كل اللي فيكي رخيص ..
ولو مفضلش غير انتي وسجانك وكل خسيس ..وانا لوحدي .. هكمل ..ولو وحدي هكمل
اتعمي اتصاب اموت .. وتفضلي علي راسي محطوطة بسيطة
وبعد ما اموت امانة يامصرتتعافي .. وشوفي النور علي اكتافي ..
وفوقي ياطيبه الطيبه بلاش طيبه العساكر زي الديابة حويطة
وقولي للعبيد تخرس .. ولولادك تقوم تحرس .. وطول ما فيكي المخلصين
هتبقي عارفة الثورة فين ..
- الثورة فين
- الثورة قامت حد فاكر يوم التلات
- تحميل قصيدة صباح شريف سؤال خفيف الثورة فين
- كلمات قصيدة الثورة فين
